'n QVRP blog

Honde | Katte | Soogdiere | Voëls | Roberts Voëlname | Boeke

26.3.20

Bloustormvoël / Blue Petrel

Halobaena caerulea

Die bloustormvoël is ’n seldsame besoeker aan die Suid-Afrikaans kus. Dié stormvoël lyk baie soos die walvisvoël, maar het donker merke op die kroon, agterkop en langs die bors. Die stert het ’n wit punt. Dit is nogal handig want hulle vlieg gereeld saam met swerms walvisvoëls.


(foto: JJ Harrison)

12.3.20

Kleinste dwergskeerbekmuis

Suncus gracilis

Soos die naam aandui is hierdie die kleinste skeerbekmuis wat in Suid-Afrika voorkom. Dit kom wydverspreid voor langs die Suid-Afrikaanse kus met die omgewing om Port Elizabeth wat hul gunsteling habitat is. Jy vind hulle ook in die binneland op die Hoëveld en in die Vrystaat.

Dié muis is donkerbruin aan die bokant en witterig onder.

Hulle maak graag nes uit fyn gras in ou termiethope

(Het iemand dalk 'n foto van ’n Kleinste dwergskeerbekmuis?)

5.3.20

Donkervlerkkeilstert / Jouanin’s Petrel

Bulweria fallax

Die voël lyk baie soos die breëvlerkkeilstert, maar vlieg laag oor die see met vinnige, vlak vlerkslae gevolg deur lang sweeftogte.

Die donkervlerkkeilstert word soms gesien aan Suid-Afrika se ooskus.

27.2.20

Elke koei het 'n stem

Navorsing aan die Universiteit van Sydney het getoon dat koeie individuele stemme het in ’n verskeidenheid emosionele situasies.

Koeie praat met mekaar en behou hul individuele stem dwarsdeur die gesprek.

PhD-student Alexandra Green van die School of Life and Environmental Sciences aan die Universiteit van Sydney het vasgestel dat die koeie individuele stemme het in ’n verskeidenheid situasies. Dit help hulle om kontak met die kudde te behou en om opgewondenheid, opwekking, betrokkenheid of benoudheid uit te spreek.

Die slotsom van die navorsing is dat boere kennis van individuele koei-stemme in hul daaglikse boerderypraktyke moet integreer.

Alexandra Green
(foto: Lynne Gardner/University of Sydney)

20.2.20

Klim-skeerbekmuis

Sylvisorex sorella sheppardi

’n Ligkleurige skeerbekmuis met ’n grys onderkant. Die klim-skeerbekmuis kom voor in die noordelike dele van die Kruger Nasionale Park.

(Het iemand dalk 'n foto van ’n Klim-skeerbekmuis?)

13.2.20

Breëvlerkkeilstert / Bulwer’s Petrel

Bulweria bulwerii

Die breëvlerkkeilstert is ’n donkerkleurige stormvoël met lang vlerke en ’n lang wigvormige vlerk. Dit is die kleinste stormvoël wat langs die Suid-Afrikaanse kus voorkom.

Dit is ’n baie seldsame besoeker aan ons kus. Jou beste kans om hulle te sien is in die Suidwes-Kaapse kuswater.


(foto: Kim Starr)

30.1.20

Skaap dink sy’s ’n Lam-brador!

Honde moet deesdae maar bedees meeding met skaap se kind vir hul base se aandag op die strand.
Die afgelope feestyd was daar op sosiale media sommer baie foto’s van mense wat met ’n troetelskaap op die strand ontspan. Op Pringlebaai is die ooi Montana baie bekend. Haar ouers is Binkie en Gary Lees, onderskeidelik die eienaar van ’n tuisskool en ’n ingenieur.