'n QVRP blog

Honde | Katte | Soogdiere | Voëls | Roberts Voëlname | Boeke

5.12.16

Vin- en bultrugwalvisse se jagveld in Antarktika

Die area rondom Wes-Antarktika is die jagveld van ’n groot aantal vin- en bultrugwalvisse.

Ongeveer 5 000 bedreigde vinwalvisse (Balaenoptera physalus) en 3 000 bultrugwalvisse (Megaptera novaeangliae) besoek die area elke somer. Dit is die bevinding van ’n groep Duitse navorsers. Hulle het ook ’n opname uitgevoer om te bepaal of daar ’n verband is tussen die walvisse se beweging en die voorkoms van die klein planktonkrefies, kril.

Planktonkrefies se naam kom van hulle grootste voedselbron, plankton.

Uit die navorsing is onder andere geleer dat vinwalvisse nie vol fiemies is as dit kom by kril nie. Hulle eet wat voorkom. Bultrugwalvisse eet ook enige kril maar hulle verkies Euphausia superba.

’n Baie belangrike punt van die navorsing is dat ons ’n streng ogie moet hou oor die kommersiële kril-vangs in die area om walvisse se voortbestaan te verseker. ’n Studie is ook nodig oor die grootste plankton-eters, baardwalvisse.

Die navorsingspan is gelei deur Helena Herr van die Universiteit van Dieregeneeskunde Hannover in Duitsland. Die studie is gepubliseer in die joernaal Polar Biology.



(foto: ITAW/Carsten Rocholl)

No comments:

Post a Comment